L’ovra dad in canzunari ecumen
In cudisch da cant communabel per omisduas confessiuns fuss aunc avon paucs onns strusch staus imaginabels. Grazia agl engaschi ecumen dad Andri Casanova e ser Jan-Andrea Bernhard ei quei ussa realitad per las baselgias dalla Sur- e Sutselva romontscha.
Ils davos onns ei la necessitad per in niev cudisch da cant carschida per omisduas confessiuns. Perquei han ellas fatg independentamein ina da l’autra emprems pass en quella direcziun. Enteifer la planisaziun da vart catolica ha Andri Casanova tschentau il mars 2018 la damonda a ser Jan-Andrea Bernhard dad evaluar ina collaboraziun resp. coediziun. Els han spert viu ch’ina coediziun fuss in pass empermettent, quei en vesta all’unitad dallas duas confessiuns, alla promoziun dil lungatg e dil cant romontsch ed era en vesta a damondas economicas. Perquei han els menau differents discuors cun gremis e persunas dil fatg ed han aschia saviu contonscher il sustegn necessari.
Tgei vessen nus da perder tier in canzunari ecumen visavi in cudisch confessiunal? La risposta ei evidenta: Nuot!
Las lavurs per in niev cudisch da cant ein multifaras e pretendan bunas cumpetenzas els secturs da musica, lungatg e teologia. Perquei eis ei d’entschatta enneu stau indicau da collaborar cun persunas dil fatg. Aschia ein persunas ord la pastoraziun segidadas da far la selecziun dallas canzuns per il niev canzunari. Ellas han sin fundament da lur experientschas saviu dar bien cussegl per contonscher in repertori vast ed adequat. Per igl aspect musical ein Claudio Simonet ed Albert Spescha stai responsabels. Cun agid da gruppas da cumponists ei vegniu cumponiu intunaziuns per tuttas canzuns, surluvrau ils accumpignaments tenor necessitad e tschentau accords da ghitara per canzuns pli modernas. Gruppas d’organists dad omisduas confessiuns han persequitau e controllau quella lavur. E la finala ein ils texts dallas canzuns vegni analisai ord vesta teologica e linguistica sut l’egida dils meinaproject Andri Casanova e ser Jan-Andrea Bernhard ch’ein omisdus teologs.
Mintga singula canzun ha giu da percuorer las lavurs suranumnadas per saver garantir ina buna qualitad musicala, linguistica e teologica. La fatschenta specialisada Müller & Schade da Berna ha lu digitalisau ils resultats en stretga collaboraziun cun Andri Casanova. Per mintga canzun ei vegniu creau in digitalisat dalla partitura per l’orgla e dalla canzun sco ella cumpara el cudisch da cant.
Finalmein han organistas ed organists a disposiziun per mintga singula canzun in’intunaziun.
Per il cant ecclesiastic ein ils organists da muntada eminenta. Perquei duein ils organists vegnir susteni entras il niev cudisch d'orgla aschi bein sco pusseivel en lur survetsch. Las partituras s’orienteschan vid standards hodierns ed ein tschenadas en consideraziun dils basegns dad organistas ed organists.
Il cudisch da cant ed il cudisch d’orgla ein vegni tschentai d’Andri Casanova. Aschia ha questa lavur saviu vegnir semplificada ed ins ha reduciu lavurs da coordinaziun. Il lectorat musical e linguistic ei surdaus a persunas dil fatg. Il product final vegn stampaus dalla Tipografia Menghini che posseda las installaziuns ed experientschas necessarias.